Пратеникот, Павле Богоевски, потврди дека е негов гласот на снимката, која беше вчера објавена на социјалните мрежи како нова „бомба“. Богоевски објави статус на својот фејсбук профил каде, спротивно на тврдењето на снимката, вели дека не нарачувал кокаин, туку масло од канабис за негова блиска личност.
Го пренесуваме статусот во целост:
„Почитувани,
Вчера на руска социјална мрежа беше објавено аудио кое авторот го нарече БОМБА и каде тврди дека нарачувам кокаин. На нашите мрежи, прво беше споделено од пропагандната твитер машинерија на ВМРО ДПМНЕ и од порталите блиски до нив, а потоа веќе го споделуваа и сите останати.
Би сакал да расчистам неколку работи:
Дали тоа е мојот глас на снимката?
Да.Дали разговарам за супстанца чиј промет е забранет?
Да. Но, во овој разговор не нарачувам кокаин. Договарам набавка на масло од канабис. За медицинска употреба, за моја многу блиска личност на која маслото од канабис и’ помогна таму каде другите лекови не можеа да и’ помогнат. Тоа го правам веќе неколку месеци и ќе го правам се’ додека е потребно.
Немам никаква намера да се правам светец, ниту да глумам дека сум изненаден зошто мојот политички противник одбра токму вака да ме нападне. Ама немам намера ниту да се правдам за мојот приватен живот. Во оваа „БОМБА“ нема договарање на милионски криминали. Нема заговарање за уништување животи. Нема местење избори. Нема ендеци и запалени кафани. Има наводи за мојот приватен живот, кои (во овој случај) се извадени од контекст.
Исто така, очекувам службите многу сериозно да го истражат овој случај. Ова не е снимка од телефонски разговор кој некако „протекол“. Поради тоа, не подложи на заштита согласно Законот за заштита на приватноста од 2015г., кој се однесува на снимките по кои постапува СЈО. Но, ова е Неовластено прислушкување и тонско снимање, предвидено со чл. 151 од Кривичниот законик и очекувам дека сторителот ќе биде изведен пред правдата.
п.с. Крајно време е да ја олабавиме законската рамка за медицинска употреба на канабисот и да ја декриминализираме личната употреба. Поддршка за луѓето што се влечат по судови поради тоа што произведуваат масло за болните!, порача Богоевски.
Пратеникот Павле Богоевски тврди дека разговорот кој беше објавен од него, го снимил всушност таксист пред неколку месеци, додека тој се возел во такси. Снимката беше објавена како нова „бомба“, а Богоевски очекува да биде покрената постапка против оној кој неовластено го снимил.
Ова го обелодени самиот пратеник одговарајќи на прашања во коментари на неговиот Фејсбук профил каде се огласи за снимката.
Тој претходно потврди дека е негов гласот на снимката, но дека не нарачувал кокаин, како што се тврдеше во објавата на разговорот, туку дека нарачувал масло од канабис за негова блиска пријателка.
„Очекувам службите многу сериозно да го истражат овој случај. Ова не е снимка од телефонски разговор кој некако „протекол“. Поради тоа, не подложи на заштита согласно Законот за заштита на приватноста од 2015г., кој се однесува на снимките по кои постапува СЈО. Но, ова е Неовластено прислушкување и тонско снимање, предвидено со чл. 151 од Кривичниот законик и очекувам дека сторителот ќе биде изведен пред правдата“, порача Богоевски.
Останува прашањето кој се крие зад псевдонимот „Илија Громовник“ на руската социјална мрежа. Од овој профил, пред околу еден месец беа објавени четири други телефонски разговори од актуелни и поранешни функционери.
Извор: fokus.mk