Неколку изненадувања во новата влада. Потпретседателката на СДСМ и актуелна вицепремиерка, Мила Царовска, ќе биде министерка за образование и наука во новиот владин состав, дознава “360 степени”.
На чело на ресорот што Царовска го водеше во претходната влада, Министерството за труд и социјална политика, ќе застане Јагода Шахпаска. Таа досега беше пратеник од редовите на СДСМ и дел од собраниската Комисија за труд и социјална политика. На неодамнешните избори беше коносителка на листата во Изборната единица 3.
![](https://360stepeni.mk/wp-content/uploads/2020/08/jagoda.jpeg)
Во ресорот транспорт и врски доаѓа градоначалникот на Штип, Благој Бочварски, кој е поранешен пратеник и потпретседател на СДСМ, а сега член на Извршниот одбор на партијата. Тоа би значело дека во Штип ќе треба да се организираат вонредни избори за градоначалник.
![](https://360stepeni.mk/wp-content/uploads/2020/08/bocvarski.png)
Во правда ќе министерува актуелниот главен технички преговарач со ЕУ, Бојан Маричиќ. Тој е секретар за меѓународна соработка на СДСМ.
![](https://360stepeni.mk/wp-content/uploads/2020/08/bm-1024x577.jpeg)
Министерка за култура ќе биде досегашната пратеничка Ирена Стефоска. Таа е доктор на историски науки и досегашна претседателка на собраниската Комисија за култура.
![](https://360stepeni.mk/wp-content/uploads/2020/08/stefoska.png)
Претходно „360 степени“ денеска објави дека од редовите на СДСМ, Оливер Спасовски, Радмила Шекеринска и Венко Филипче и во новата влада ќе раководат со истите ресори: внатрешни работи, одбрана и здравство. За нов шеф на СЕП се најавува Никола Димитров. СДСМ треба да предложи и вицепремиер за економски прашања, функција на која е можно да дојде Фатмир Битиќи, претседател на партиската комисија за финансии.