Болничарките бараат извинување од Биба Додева затоа што ги нарече „фуфици и смрдли“

Прочитај за: 2 минути

Здружението на медицински сестри, акушерки, техничари и стоматолошки сестри бара јавно извинување од претседателката на здружението Борка и поп пејачка Биба Додева. Оваа реакција на медицинарите доаѓа по објавата на Додева, во која таа не социјалните мрежи ги нарече смрдли исфрустирани, покондурени фуфици и уште низа на други навреди, бидејќи и погрешиле доза на терапија.

Тие во отворено писмо и укажуваат на Додева дека во случајот, требало да побара соодветна одговорност од виновникот според Закон за заштита и права на пациенти. Сметаат дека со нејзиниот низок речник таа се обидела да го сруши угледот на една од најважните професии во здравствениот систем.

Во продолжение, реакцијата на ЗМСТАС:

Почитувани, Унијата на ЗМСТАС предводени од Здружението на медицински сестри, техничари, акушерки и стоматолошки сестри „ЗА НАС“ би сакала јавно да го истакне незадоволството од произнесениот јавен став во однос на медицинските сестри од страна на естрадниот уметник и претседател на здружение на граѓани – Биба Додева.

Користејќи недолични изјави со низок вокабулар таа се обиде да го сруши угледот и авторитетот на една од најважните професии во здравствениот систем.

Во текот на минатата недела во нашето здружение пристигнаа голем број реакции од нашите членови, по што извршниот одбор на Унијата одлучи јавно да го истакне ставот на над 5000 медицински сестри од целата земја:

Почитувана, бараме јавно да се извините и да ги повлечете своите изјави во кои го валкате угледот на нашата професија.

Ние досега немаме слушнато за сличен случај, во кој јавното влијание се користи за деструктивни цели наспроти поддршката која ни е потребна во еден ваков турбулентен период.

За изолираниот случај постои Закон за заштита и права на пациентите преку кој можевте да побарате соодветна одговорност од виновникот.

Мудроста на нашата хумана професија не е да судиме, туку да умееме да си ја сакаме професијата, колегите и пред се пациентите.

Жал ни е за вашето лошо искуство, но уште повеќе жалиме за навредите кои индиректно ги упативте кон медицинските сестри кои го загубија својот живот во текот на пандемијата, кон оние кои деноноќно се во болниците, ординациите, операционите сали, интензивните неги, центрите за дијализа, ковид центрите, во родилните сали, во здравствените домови… на само чекор до болните.

Најголемиот пријател на човекот се делата, а во нашата професија тие се секогаш пред нас.“

SHARE