Биљали: Уставот ќе го смени новиот парламент  

Овој парламентарен состав нема да ја почне процедурата за внес на Бугарите во Уставот. Нема енергија за тоа, освен ако се поделат пратениците на опозицијата, што не е мое да го проценувам или коментирам, е ставот на професорот и аналитичар Мерсел Биљали.

Тој за Слободен печат вели дека изборите ќе се случат во редовниот термин и новиот парламентарен состав ќе ја почне и брзо ќе ја заврши процедурата за измена на Преамбулата на Уставот.

– Ги слушнавме пораките од европските лидери дека тоа треба да се случи што е можно побрзо, но не сум уверен. Скринингот на законодавството нема да заврши за помалку од 18 месеци, а Втората меѓународна конференција со Брисел ќе се случи откако ќе заврши скринингот. Има време да се почекаат и следните избори, па да се почнат уставните измени. Ќе изгубиме неколку месеци во процесот, но тоа е – вели Биљали.